Never Again

NEVER AGAIN

"Never Again"

anang tibak

sa t-shirt ko

nakatatak

"Never Again"

na'y palasak

karanasang

nakaimbak

sa daan kong

tinatahak

kahit ito'y

lubak-lubak

nakatanim

na sa utak

- gregoriovbituinjr 

02.14.2026

Sa ika-7 Black Friday Protest ng 2026

SA IKA-7 BLACK FRIDAY PROTEST NG 2026

tumapat ng Friday the 13th ang protesta

laban sa mga kurakot at palamara

"mga kurakot, ikulong!", sigaw ng masa

nais nilang kamtin ng bansâ ang hustisya!

kapag dukhang gutom, nagnakaw, agad kulong!

ngunit yaong sa kaban ng bayan nandambong

ng bilyon-bilyong piso ay imbestigasyon

muna sila nina TONGresman at SenaTONG

sa ating bansa'y kawawà ang mamamayan

dahil sa kurakutan sa pamahalaan

kayâ nagbubundatan ang nanunungkulan

kayâ dapat nang kumilos ang sambayanan

mga dinastiyang pulitikal, lansagin!

bulok na sistema'y palitan at durugin!

sistemang patas sa lahat na'y pangarapin!

lipunang makatao'y itayo na natin!

- gregoriovbituinjr.

02.13.2026 (Friday the 13th)

Panagutin ang buktot

panagutin ang buktot

ituwid ang baluktot

ikulong na't managot

ang lahat ng kurakot

- tanaga-baybayin

gbj/02.13.2026 

(7th Black Friday Protest ng 2026)

Mahirap bansagang makatâ ng lumbay

MAHIRAP BANSAGANG MAKATÂ NG LUMBAY

mahirap bansagang / makatâ ng lumbay

kung nakita'y pulos / hinagpis na tunay

ganyan ako mulâ /asawa'y namatay

pawang luha na lang / ang aking kaakbay

subalit paano / ang aking gagawin

kung tangi kong sinta'y / nawalâ sa akin

yaring kapalaran / ng makatang taring

ay mababasa lang / na luhà ang sapin

ang búhay na ito'y / talaga bang ganyan?

pawang dalamhati / ang nasisilayan?

o ang makatâ na'y / nagulumihanan?

pagkat tinahak na'y / landas ng kawalan?

kahungkagang iwi / yaring dumadaloy

sa bawat kong ugat, / ano pang susuloy

buti't ang makata'y / di pa nagpalaboy

pagkat yaong pluma / wari'y nag-aapoy

- gregoriovbituinjr.

02.13.2026 (Friday the 13th)

Ang pabahay ay karapatang pantao

ANG PABAHAY AY KARAPATANG PANTAO

batid ng maralitâ ang katotohanang

bawat pabahay ay pantaong karapatan

kayâ iyang demolisyon ay kasamaan

pagkat dangal ng dukhâ ang niyuyurakan

kayâ dukha'y patuloy na nakikibaka

pagkat magkaroon ng bahay ay hustisya

bahay at búhay ay ipaglalaban nila

laban sa mga tuso't mapagsamantala

lalaban nakatira man sa barungbarong

upang ipagtanggol ang kaunti mang meron

ipaglalaban kahit maliit mang silong

basta't sa pamilya'y mayroong nagkakanlong

kayâ bago kayo magdemolis ng bahay

ng maralitâ, pag-isipan ninyong tunay

hangga't wala pang malilipatang mahusay

huwag silang galawin nang walang umaray

- gregoriovbituinjr.

02.12.2026

* litrato mulâ sa google

Ang tula'y aking tulay - tanaga-baybayin

ang tula'y aking tulay

sa bayan at sa búhay

kapwa aping kalakbay

ay tutulaang tunay

- tanaga-baybayin

gbj/02.12.2026

Ang tula'y aking tulay - tanaga-baybayin

ang tula'y aking tulay

sa bayan at sa búhay

kapwa aping kalakbay

ay tutulaang tunay

- tanaga-baybayin

gbj/02.12.2026

Pag-inom ng dyus na luyang dilaw

PAG-INOM NG DYUS NA LUYANG DILAW

tuwing makalawa ng umaga

umiinom ako ng salabat

na luyang dilaw, di simpleng lúya

kundi turmeric, na pampalakas

magaling nga raw ito sa immune

system na tumutulong labanan

ang anumang impeksyon, kung meron

balat pa'y pinangangalagaan

lunas daw sa pamamaga't sakit

upang lumusog din daw ang pusò

inumin lang minsan, di malimit

o kaya sa pagkain ay ihalò

iniinom na'y dyus na turmeric

kalusuga'y lagi nang isipin

mahirap nang ang mata'y tumirik

lalo't kayrami pang susulatin

- gregoriovbituinjr.

02.12.2026

Ibasura

IBASURA

kalat sa lansangan, ibasura

ilagay sa wasto ang basura

nabubulok at di nabubulok

paghiwalayin, di sinusunog

ang mga mata'y ating imulat

sa paligid na animo'y gubat

nang dahil sa basurang nagkalat

walisin din pati mga korap

ibasura pati trapong bugok

pati mga lingkod-bayang bulok

isama ang kontraktor na hayok

na sa ghost flood control nakatutok

mga upos, plastik, ibasura!

pati mga trapong palamara!

pulitikong korap, isama na!

bulok na sistema, ibasura!

- gregoriovbituinjr.

02.11.2026

Baril ang diwà, bala ang salitâ

BARIL ANG DIWÀ, BALA ANG SALITÂ

ang manunulat ay mandirigmâ

pistola, glock o garand ang diwà

bala naman ang mga salitâ

ganyan din maghandâ ang makatâ

pinatatagos nila sa pusò

ang mga katagang parang punglô

tulad ng makatang naglalahò

lilitaw muli pag napasubò

ang manunulat ay namamatay

pag nobela'y natapos na tunay

ngunit siya'y muling mabubuhay

pag may bagong akdang sumisilay

ngayon nga'y sinisimulang muli

ang mga kabanatang nagbinhi

sa isip, paliko-likong gawi

sa iwing diwa'y nananatili

- gregoriovbituinjr.

02.10.2026

* kasabihan sa t-shirt ay mula kay Douglas Horton

* litratong kuha ng makata sa isang tindahan ng barbeque

3 HR staff, 'hinold' ng mga di pinasweldong manggagawa

3 HR STAFF, 'HINOLD' NG MGA DI PINASWELDONG MANGGAGAWA

kaytindi ng balitang aking nabasa

tatlong istap ng Human Resource Department

ang 'hinold' umano ng mga obrerong

di pinasweldo, aba'y dapat talaga

nagpakahirap sa gawaing konstruksyon

ang mga obrero sa B.G.C., Taguig

upang makakain lamang ang pamilya

tapos di pa sasahod ng tamang oras

pagsasamantala na sa manggagawa

kaya tama lang magalit silang sadya

construction workers silang nagkandakuba

upang mga gusali'y sadyang magawa

di naman hostage-taking, anang barangay

dahil wala namang ginamit na armas

buti't pumayapa ang tensyong nangyari

at susweldo na raw sa Lunes, ang sabi

Sabado ng gabi nang maganap yaon

nagkaisa'y manggagawa sa konstruksyon

pinakita'y galit, tama lamang iyon!

pag api na'y dapat magkaisa ngayon!

- gregoriovbituinjr.

02.09.2026

* ulat mula sa pahayagang Bulgar at Pang-Masa, Pebrero 9, 2026, pahina 1 at 2    

Di nagsisisi sa pagiging pultaym na tibak

DI NAGSISISI SA PAGIGING PULTAYM NA TIBAK

di ako nagsisising naging aktibista

bilang pultaym at makatang lingkod ng masa

noon pa man ito'y pinagpasyahan ko na

ng buong puso't diwà, desisyon talaga

at hanggang ngayon ito'y pinaninindigan

di man sang-ayon ang pamilya't kaibigan

kung sakaling idulot nito'y kamatayan

di nagsisisi't tanggap ang kahihinatnan

inalay ko na ang buhay sa pagsisilbi

sa uri, sa bayan, sa daigdig ng api

sa banal na adhika'y bakit magsisisi

dapat ngang kalusin ang kurakot at imbi

tuloy lang ako sa matiyagang pagkilos

bagamat namimighati't naghihikahos

sistemang trapo't dinastiya'y matatapos

kung bulok na sistema'y mawakasang lubos

- gregoriovbituinjr.

02.09.2026

Hustisya kina Renee Nicole Good at Alex Pretti

HUSTISYA KINA RENEE NICOLE GOOD AT ALEX PRETTI

dalawang pinaslang ng ahente ng U.S.
dalawang sibilyang walang baril at laban
Enero nang mangyari sa Minneapolis
na higit dalawang linggo lang ang pagitan

parang naulit lang ang nangyari kay George Floyd
na namatay habang arestado ng pulis
isyu ng rasismo't karapatang migrante
imbes pakikipagkapwa-tao'y pagkitil

dahil sa anti-immigrant at protectionist
policies ni Trump, na bansa'y pang-Kano lamang
pinalalayas yaong di nila kalahi
itinataboy ang di kakulay ng kutis

sina Renee Nicole Good at Alex Pretti ay
binaril nang walang awà, subalit sila
ay Amerikano, kasama sa protesta
upang protektahan ang di nila kakulay

pagpupugay sa lahat ng nagpo-protesta
laban sa mga polisiyang mapanghati
katarungan sana'y kamtin ng mga ito
na nagtatanggol sa karapatang pantao

- gregoriovbituinjr.
02.08.2026

* litrato mula sa google

Salamat sa bag

SALAMAT SA BAG

salamat sa bag na bigay sa akin
nang lumahok sa isang lakbay-aral
na hinggil sa makasaysayang Pasig
napag-aralan sa diwa'y sumiksik

at sa pag-uwi'y agad na nag-selfie
nabili kong t-shirt na isinuot
ay may tatak ng bayaning Supremo,
ang dakilang Gat Andres Bonifacio

kaysarap mag-aral ng kasaysayan
ng nangyari't lugar sa bansa natin,
kayraming pinuntahan, mga kwento
tulad ng tagumpay ng Nag-Sabado

salamat sa ganitong aktibidad
lakbay-aral sa bayan at siyudad
bag na bigay ay iingatang sukat
na bahagi ng aking pagkamulat

- gregoriovbituinjr.
02.08.2026

* matapos dumalo sa 2nd tour ng historic Pasig, Pebrero 7, 2026

Wala sa toreng garing

wala sa toreng garing

kaming makatang taring

ngunit sana'y magningning

ngayong Buwan ng Sining

- tanaga baybayin

gbj/02.07.2026

Paglahok sa 2nd tour of historic Pasig

PAGLAHOK SA 2ND TOUR OF HISTORIC PASIG

Maikling sanaysay at tula ni Gregorio V. Bituin Jr.

Isa ako sa nagkainteres na lumahok nang makita ko ang anunsyo ng Samahang Pangkasaysayan ng Pasig (SPP) sa pesbuk hinggil sa 2nd tour of historic Pasig. Agad akong kumontak at sinabing nais kong sumama. Agad naman silang tumugon.

Pebrero 7, 2026, madaling araw pa lang ay gising na ako. Hindi ako dapat mahuli sa usapan. Maaga ako sa kitaan sa Plaza Rizal, at dumating ako roon bago mag-ikawalo ng umaga at umupo sa naroong mahabang bangko at naghintay. Ilang sandali  pa'y dumating na sila at agad akong nagpakilala.

Naghintayan pa ng mga dadalo. At nang kumpleto na ay lumakad na kami. Una naming pinuntahan ang Guanio Ancestral House na malapit lang sa Plaza Rizal. Nag-usap muna kami sa bungad ng tahanan hinggil sa kasaysayan ng nasabing lugar, na umano'y dating Cuartel ng mga Guardia Sibil sa Pasig noong panahon nina Gat Andres Bonifacio. Mahalaga ang kasaysayang ito dahil dito nakuha ng mga Katipunero, sa pangunguna ni Heneral Valentin Cruz, ang labimpitong armas mula sa mga Kastila noong magsimula ang Rebolusyong 1896. Kilala ang pangyayaring iyon bilang Nagsabado sa Pasig.

Inanyayahan kaming umakyat sa ikalawang palapag. Nakasabit sa dingding doon ang isang painting ni Felix Resurrection Hidalgo na kasabayan ni Juan Luna.

Sumunod ay nagtungo kami sa eskwelahang Colegio Del Buen Consejo at nagtungo sa museo nito.

Sumunod ay nagtungo kami sa Plaza Bonifacio, na ang estatwa ni Bonifacio ay nakasakay sa kabayo, kung saan may nakasulat na CENOTAPH, na ibig sabihin daw ay bantayog ng mga bayaning nagbuwis ng buhay para sa bayan subalit di ang katawan ay di na natagpuan. Isa lang daw ito sa dalawang estatwang nakasakay si Bonifacio, na ang isa'y nasa Uptown Bonifacio sa Taguig.

Sunod ay pinuntahan ang simbahan ng Pasig at nakita ang mga naka-displey na limang kampana nito. Naroon din ang estatwa ni Padre Fray Manuel Blanco, na dating kura paroko ng Pasig, at may-akda ng saliksik at pag-aaral sa higit 1,200 na katutubong tanim o ispesye sa bansa o Flora de Filipinas.

Umakyat sa museo ng simbahan, at nakita ang naka-displey na lumang mekanikal na orasan na gamit para sa oras ng pagkalembang ng kampana. Subalit di na kami nakaakyat pa sa kampanaryo.

Umuulan noon, kaya nagtungo muna kami sa Museo ng Pasig at doon nagpatila ng ulan. Subalit umakyat na rin kami sa museo kung saan naroon ang estatwa ng Mutya ng Pasig. Naka-display din doon ang mga kilalang tao mula sa Pasig, tulad nina Lope K. Santos, mag-asawang National Artists na sina Lamberto at Daisy Abellana, national artist for music Ramon Santos, Senate President Jovito Salonga, Senador Rene Saguisag, at iba pa. Mahaba-haba rin ang talakayan doon.

Natalakay din na ang Pasig dati ay bahagi ng probinsya ng Tondo, Maynila, noong panahon ng mga Kastila. At nang maisyu ang Philippine Commission Act 137 ay nalikha ang lalawigan ng Rizal na ang kapitolyo ay Pasig. Sa Rotonda raw umiikot pabalik ang sasakyang Tranvia. At ang Santa Rosa sa Pasig ay dating isla. Naging bahagi na ng Metro Manila ang Pasig noong 1975. Ang Pasig ay naging lungsod noong Enero 21, 1995, nang maisabatas ang Republic Act No. 7829

Sunod ay pinuntahan namin ang tahanan ni Heneral Valentin Cruz, kung saan idinaos doon ang pulong ng mga Katipunero, isang pangyayaring tinawag na Asamblea Magna, kung saan dumalo roon sina Gat Andres Bonifacio, Gat Emilio Jacinto, Heneral Emilio Aguinaldo, Heneral Valentin Cruz, at iba pang mga pinunong Katipunero.

Ayon sa kasaysayan, noong Mayo 3, 1896, isang pangkalahatang pagpupulong ng mga pinuno ng Katipunan ang ipinatawag ni Supremo Andres Bonifacio. Ito'y idinaos sa Pasig sa tahanan ng lokal na pinuno ng Katipunan na si Valentin Cruz. Tinawag ang papupulong na iyon na Asamblea Magna na isa sa pinakamahalagang pangyayari sa kasaysayan ng Katipunan. Ito na rin yata ang huling pag-uusap nina Gat Andres Bonifacio at Heneral Emilio Aguinaldo bago magsimula ang himagsikan, at bago mapatay si Bonifacio. (Wala sa Tejeros Convention si Aguinaldo).

Nakapanayam pa ni Dean Carlos Tech si Heneral Valentin Cruz hinggil sa naganap na Nagsabado sa Pasig, at ang labimpitong armas na nakuha sa mga Kastila ay dinala ng mga Pasigenyo kinabukasan sa Labanan sa San Juan, na kilala ngayon sa kasaysayan na Pinaglabanan.

Pagkagaling sa tapat ng bahay ni Heneral Vakentin Cruz ay nagtungo na kami sa Bahay na Tisa, kung saan ito ang bahay ng bagong henerasyon ng pamilya Tech. Isa ito sa pinakamatandang bahay sa Pasig na nakatayo pa rin hanggang ngayon. Panahon pa ng pananakop ng mga Kastila nang ito'y maitayo. Ang itsura ng tahanan ay para bang ang pinagsyutingan ng huling bahagi ng pelikulang Oriang, na ginampanan nina Lovi Poe at Gina Pareno.

Mahaba pa ang talakayan sa nasabing tahanan, at doon na rin kami nananghalian. Natapos kami roon bandang ala-una y medya ng hapon.

Sa aking pag-iisa ay napag-isip kong marami pang kasaysayan ang dapat halungkatin at isulat hinggil sa Pasig. Hindi lamang noong panahon ng Kastila, kundi sa iba pang panahon, tulad ng anong naganap sa Pasig sa panahon ng pananakop ng mga Amerikano? May mga martir ba sa Philippine-American War? Anong mga naganap sa Pasig sa panahon ng pananakop ng mga Hapon? Noong pamahalaan ng Commonwealth? Noong panahon ng martial law? Ah, marami pang dapat saliksikin sa kasaysayan. At kung may pagkakataon, ako'y tutulong sa pananaliksik at mag-aambag ng anumang makakaya.

Taospuso akong nagpapasalamat sa Samahang Pangkasaysayan ng Pasig (SPP) at naging kalahok ako sa ganitong pagtitipon - ang 2nd Tour of Historic Pasig. Kung mayroon pang mga ganitong walking tour at kakayanin lang ng oras ko ay tiyak na dadalo ako. Mahalaga ang mga natututunan sa kasaysayan, na maaari ring maibahagi sa iba.

Nais ko ring imungkahi na magkaroon ng aktibidad sa Mayo 3, 2026, sa ikasandaan tatlumpung (ika-130) anibersaryo ng Asamblea Magna, bukod pa sa pagdiriwang ng ika-130 anibersaryo ng matagumpay na Nag-Sabado sa Pasig sa Agosto 29, 2026. Maraming salamat po!

ANG IKALAWANG LAKBAY-ARAL HINGGIL SA MAKASAYSAYANG PASIG

isa lamang ako sa mga tumugon

hinggil sa kasaysayan ng Pasig noon

salamat, nakadalo sa pagtitipon

maraming natuto sa kaygandang layon

pinuntahan ang bahay na dating Cuartel

na kinampuhan ng mga Guardia Civil

na mga tao ng mga mapaniil

buti't Katipunero sila'y nasupil

nakinig sa kanilang mga historya

habang aking tangan ang kwaderno't pluma

nakipagtalakayan, napuntahan pa

ang ginanapan ng Asamblea Magna

sa Bahay na Tisa pa nananghalian

isa sa pinakamatandang tahanan

sa Pasig, pesante'y ito ang puntahan

sa nakikibaka'y ito ang kanlungan

ang ganitong lakbay-aral ay mabuti

pagkat Pasig ay maipagmamalaki

dama ang tinahak ng mga bayani

sa pagsama rito'y di ka magsisisi

02.07.2026

Kung ako ang bituin

KUNG AKO ANG BITUIN

kung ako ang bituin

sa iyong panaginip

anong madarama mo?

kaysarap bang umidlip?

kung ako ang bituing

natatanaw sa langit

na lalambi-lambitin

ako ba'y anong rikit?

kung ako ang bituin

sa pagitan ng unos

sa gabing di pusikit

sa ningning tiyak kapos

kung ako ang bituing

masid ng dalaginding

ang dala ko'y pag-ibig

sa magandang tanawin

kung ako ang bituing

sa ulap nagkakanlong

ay di kita ang ningning

at luhang bumabalong

kung ako ang bituing

liwanag sa karimlan

nasa isip ko'y maging

tanglaw sa sambayanan

- gregoriovbituinjr.

02.07.2026

* litrato ng aklat hinggil kay Vincent van Gogh, na may likha ng painting na Starry Night, na naging inspirasyon ng kantang "Vincent" o "Starry, Starry Night" ni Don McLean

Sa ikaanim na Black Friday Protest ng 2026

SA IKAANIM NA BLACK FRIDAY PROTEST NG 2026

unang Biyernes ng Pebrero, wala pa ring

nakulong na malalaking isdâ o pating

ito nga'y isang malaking alalahanin

baka kurakot ay patuloy sa gawain

paano pa ba mapapanagot ng bayan

ang sangkatutak na kurakot at kawatan

na buwis ng bayan ang pinagdiskitahan

kayâ di maayos ang serbisyo sa tanan

ay, dapat nang baguhin ang sistemang bulok

at ibagsak ang mga pulitikong bugok

kahit matalinong trapo'y nagiging hayok

sa bilyon-bilyong buwis at pondo sa tuktok

dapat nang wakasan ang bulok na sistema

kayâ, O, Bayan, dapat na tayong mag-alsa

- gregoriovbituinjr.

02.06.2026

* kuha sa tapat ng UP Oblation at sa Bahay ng Alumni, 02.06.2026

Sa ika-25 anibersaryo ng kamatayan ni Ka Popoy Lagman (2 tula)

SA IKA-25 ANIBERSARYO NG KAMATAYAN NI KA POPOY LAGMAN - Tula 1

isa lamang ako sa karaniwang tibak

na nakadaupang palad siyang personal

habang nasa kilusang estudyante't dyaryo

pa kami, nang aking niyakap ang prinsipyo

sa Araneta Coliseum ay nahalal

siyang pangulo ng B.M.P., manggagawa

naroon ako sa Ayala nang sumigaw

siya ng "Rebolusyon!" sa rali n'ung araw

tinayo'y kapatiran ng mga pangulo

ng unyon, na inorganisa ngang totoo

napakarami niyang natulungang unyon

na misyon sa loob ng mahabang panahon

nasa tanggapan ako ng Sanlakas noon

nang mapabalitang walang awang pinaslang

si Ka Popoy sa UP Bahay ng Alumni

mga kasama'y nagpuntahan sa ospital

sa simbahan sa UP siya ibinurol

at nakapula kaming iminartsa siya

mula UP hanggang doon sa Marikina

nang inilibing ang katawang lupà niya

pagpupugay kay Ka Popoy, mapagpalayà!

mabuhay ang diwà ng bayaning dakilà!

patuloy kami sa pangarap at adhikà

itayo'y lipunan ng uring manggagawà

- gregoriovbituinjr.

02.06.2026

* kuha sa UP Bahay ng Alumni, 02.06.2026

Tula 2 (acrostic poem)

POPOY LAGMAN, LENINISTA

Popoy Lagman, na kilala ring Ka Popoy sa madla

Organisador na Leninista ng manggagawa

Pilipinong rebolusyonaryo, tanyag, dakila

O, bakit ba ikaw ay pinaslang nang walang awa

Yinanig ang bayan sa iyong biglang pagkawala

Leninistang nagturo sa amin ng rebolusyon

Ang tagumpay ni Lenin noon, inaaral ngayon

Gurong tunay si Ka Popoy nang magawa ang layon

Manggagawa, magkaisa kayo sa inyong misyon

Ang itayo n'yo ang lipunang sosyalista ngayon

Nagkakaisang puso, diwa't prinsipyo'y di lingid

Laban sa kapitalismong sadyang sistemang ganid

Edukador ng obrerong ating mga kapatid

Nang kawalan ng hustisya'y tuluyan nang mapatid

Isang pagpupugay kay Ka Popoy ang aming hatid

Nagtataguyod ng Leninistang diwa't prinsipyo

Isinasapuso'y tunay na diwang makatao

Sosyalistang lider siyang may pamanang totoo

Tahakin ang landas ni Ka Popoy, ang Leninismo

At palakasin ang pagkakaisa ng obrero

- gregoriovbituinjr.

02.06.2020

Ang skyscraper sa Abu Dhabi

ANG SKYSCRAPER SA ABU DHABI

sa kaylaking skyscraper sa Abu Dhabi

ay makikita ang kaaya-ayang mukhâ

ni Alex Eala at ng ating bandilà

na isang sandaling maipagmamalaki

at kasabay iyon ng Women's Tennis Open

lalo't kahanga-hanga ang mga nagawâ

ni Alex na inirepresenta ang bansâ

maraming Pinoy roon ang nauhâ man din

kung nasa Abu Dhabi ka't nakita iyon 

hahangà ka't manonood ng kanyang larô

ginawâ niya para sa bansa'y di birò

tilà pasan niya sa balikat ang nasyon

buô ang loob sa bawat pakikibaka

sa isports na tennis, nilikha'y kasaysayan

isa nang landas tungo sa kadakilaan

pagpupugay sa iyo, O, Alex Eala!

- gregoriovbituinjr.

02.06.2026

* litrato mulâ sa isang fb page na nasa kawing na: https://www.facebook.com/photo?fbid=122316254204025710&set=a.122152794008025710 

Loob, labas, lalim, lubak, labò at linaw

LOOB, LABAS, LALIM, LUBAK, LABÒ AT LINAW

napagnilayan ang mga salitang ito

habang nakatalungkô, nilay na totoo

salitang tilà magkaugnay sa buhay ko

kayâ mga salita'y tinipon sa ulo

ikà ngâ ni Balagtas, "sa loob at labas

ng bayan kong sawi", patakara'y di patas

di ba't pakikipagkapwa dapat ang batas?

mundo'y kaygulo, ang marami'y di parehas!

kayrami pang mga lubak na tatahakin

bago paroroonan ay aming marating

ngunit nang tumawid sa malalim na bangin

para bang dinadala'y pighati't panimdim

lumalabò ang ilog dahil sa basura

kung ito'y linisin natin, lilinaw pa ba?

tayo ang kikilos upang bansa'y gumanda

diwa'y malinaw at payapang puso'y dama

dapat lang positibo ang ating pananaw

sa dilim ng gabi'y sisikat din ang araw

loob, labas, lalim, lubak, labò at linaw

mga salitang sa kalooban ay tanglaw

- gregoriovbituinjr.

02.05.2026

Ang pressure, ayon kay Alex Eala

ANG PRESSURE, AYON KAY ALEX EALA

maraming nagtatanong kay Alex Eala

kung presyur ba'y paano niya hinaharap

"bahagi ng trabaho ko ang presyur," anya

"may dagdag pang presyur ang paglaro sa bansa"

"balewala lang ito kung ikukumpara

sa presyur na dinaranas ng karaniwang

Pinoy na kumakayod para sa pamilya,

at balewala ang presyur na dinanas ko

sa sakripisyo ng aking mga magulang"

pangmasang kaisipan, matalinong sagot

sadyang mapapahiya ang mga kurakot

kaya kahanga-hanga si Alex Eala

kaygaling sa tennis, kayhusay na atleta

kahit saan maglaro, dala ang bandilà

tunay na nangungunang atleta ng bansâ

- gregoriovbituinjr.

02.05.2026

* mga litrato mula sa google

Pangungulilà

PANGUNGULILÀ

nasanay akong mag-isa

dahil sa pangungulilà

nasanay sa pag-iisa

ito ba'y nakatutuwâ?

bahagi nga ba ng búhay

o ito ba'y pagkabigô

sa pinangarap na búhay

lalo na't sinta'y naglahò

tiningala ko ang langit

minasdan ang panganorin

bakit búhay ay kaylupit?

anong ibig kong sabihin?

oo, di ko madalumat

ang lakad at tinatakbo

parang tasang nagkalamat

at nag-iisa sa mundo

- gregoriovbituinjr.

02.04.2026

* ikawalong anibersaryo ng pamamanhikan (02.04.2018-2026)

* litrato mula sa komiks sa magasing Liwayway

Tinuring mang makatâ ng lumbay

TINURING MANG MAKATÂ NG LUMBAY

tinuring na makatâ ng lumbay

sa mga tulang may luhang taglay

lalo't nag-iisa na sa buhay

bálo na't laging di mapalagay

yaring pusò na'y nanlulupaypay

ang búhay na'y nawalan ng kulay

pati na tula'y naglulupasay

sa sahig ng hinagpis at lumbay

kayraming kathang sa sinta alay

dama ang kirot ng pagkawalay

habang ibang kathang tula'y tulay 

sa bayang madalas naninilay

laksang sugat man ang lumalatay

taos sa pusò ang pagsisikhay

nang búhay pa'y pasiglahing tunay

tinuring mang makatâ ng lumbay

- gregoriovbituinjr.

02.04.2026

* sa ikawalong anibersaryo ng pamamanhikan (02.04.2018-2026)