TULAD NG LIGAW NA HALAMAN
saanman mapadpad ang tibak na tulad ko
parang ligaw na halaman, tutubo ako
itatanim ko ang binhi ng sosyalismo
sa matabang lupa'y patutubuin ito
nais kong lipunang makatao'y malikha
habang nililipol bawat damong kuhila
sasagipin ang mga inang lumuluha
na mahal na anak ay in-EJK sadya
oorganisahin ang kapwa mahihirap
upang maitayo ang lipunang pangarap
lipunang ang lahat ng tao'y nagsisikap
nagpapakatao't sa kapwa'y mapaglingap
ganito mangusap ang tibak na Spartan
di dungo, masa'y tinuturuang lumaban
para sa kinabukasan at karapatan
upang makamit ang hustisyang panlipunan
- gregoriovbituinjr.
03.10.2024
Walang komento:
Mag-post ng isang Komento